کراچی میں جمعے کی شام پاک سرزمین پارٹی کے سربراہ مصطفیٰ کمال کے ساتھ ایک پریس کانفرنس کرتے ہوئے حفیظ الدین ایڈووکیٹ نے تحریک انصاف کی مقامی قیادت کو تنقید کا نشانہ بنایا۔ ان کا کہنا تھا کہ وہ مسلم لیگ نواز میں رہنے بعد میں تحریک انصاف میں اس لیے شامل ہوئے کہ شاید کوئی تبدیلی آجائے۔

’کراچی میں ہم نے محنت کرکے پارٹی کو کھڑا کیا اور کوشش کی کہ منتخب باڈی بنے لیکن اس وقت عمران خان نا تجربے کار، ناعاقبت اندیش دوستوں میں گھرے ہوئے ہیں۔‘

حفیظ الدین ایڈووکیٹ کراچی کے صوبائی حلقے پی ایس 93 سے منتخب ہوئے تھے۔ انہوں نے حلقہ 245 سے تحریک انصاف کے امیدوار امجد اللہ خان کی ایم کیو ایم میں شمولیت کا حوالہ دیتے ہوئے کہا کہ جس حلقے سے تحریک انصاف نے 53 ہزار ووٹ لیے تھے وہاں کا امیدوار چلا گیا۔

حفیظ الدین ایڈووکیٹ کا کہنا تھا کہ انہوں نے تنظیمی ایشوز پر اپنا احتجاج ریکارڈ کرایا لیکن اس کا کچھ حاصل نہیں ہوا، اس صورتحال سے ناامیدی نے جنم دیا لیکن مصطفیٰ کمال نے نیا راستہ دیا ہے۔

سندھ اسمبلی میں تین سال تک تحریک انصاف کے پارلیمانی رہنما کے عہدے پر فائز حفیظ الدین ایڈووکیٹ نے الزام عائد کیا کہ سندھ اسمبلی میں اپوزیشن بانجھ ہے اس کی کوئی حیثیت نہیں ہے۔

’کراچی کے مسائل پر ہم پالیسی بنائیں گے، کے ایم سی اور واٹر بورڈ پر مافیا نے پنجے گاڑ دیے ہیں یہاں ٹرانسپورٹ کا ناقص ترین نظام ہے۔ مصطفیٰ کمال ان مسائل پر پی ایچ ڈی ہیں، وہ مل کر حقیقی تبدیلی کی طرف بڑہیں گے۔‘

حفیظ الدین ایڈووکیٹ پہلی سیاسی شخصیت ہیں جو ایم کیو ایم سے باہر سے پاک سرزمین پارٹی میں شامل ہوئی ہے۔

یاد رہے کہ اس وقت تک چار رکن صوبائی اسمبلی پاک سرزمین پارٹی میں شامل ہوچکے ہیں، جن میں ایم کیو ایم کے ڈاکٹر صغیر احمد، افتخار عالم، بلقیس مختار اور اشفاق منگی شامل ہیں۔

کراچی میں اتوار کے روز باغ جناح میں پاک سرزمین پارٹی کی جانب سے جلسہ منعقد کیا جائے گاآ اس جلسے کی کامیابی کے لیے مصطفیٰ کمال کراچی کے کچھ علاقوں کے علاوہ حیدرآباد، ٹنڈوالہیار اور میرپورخاص کے دورے بھی کرچکے ہیں، جلسے کے لیے شہر بھر میں وطن پرستوں کے نام سے بینر اور وال پوسٹر لگائے گئے ہیں۔

مصطفیٰ کمال کا کہنا ہے کہ اتوار کا جلسہ قتل و غارت اور اقربا پروری کے تابوت میں آخری کیل ثابت ہوگا، وہ لوگ جو گھر میں بیٹھے ہیں قدم نہیں بڑہا رہے وہ باہر نکلیں کیونکہ وہ لوگوں کو زندگیاں بچانے آئے ہیں۔

دیوالیہ ہونے والے 14 کلبوں کے تقریباً 300 ’پھنسے ہوئے‘ کھلاڑی اب تنخواہوں کی عدم ادائیگی پر اپنے معاہدے منسوخ کرنے کے لیے قانونی کارروائی کر سکتے ہیں۔

یہ کھلاڑی کسی بھی کلب کی انتظامیہ میں اثاثہ تصور کیے جاتے تھے۔

تاہم رومانیہ کے کھلاڑیوں کی یونین افان کی مہم ملک کے دیوالیہ پن کے قانون میں تبدیلی پر منتہج ہوئی ہے۔

بی بی سی سے بات کرتے ہوئے برطانوی کھلاڑی رہیما عوبید نے بتایا کہ ریپڈ بخارسٹ کلب نے انھیں سنہ 14-2013 کے سیزن کے سات ماہ کی تنخواہ تاحال ادا نہیں کی جو تقریباً 40 ہزار پاؤنڈ سے زائد بنتی ہے۔

ان کا کہنا تھا کہ ’میں سیزن کے آغاز سے قبل ایک دوستانہ میچ کھیلنے آیا تھا، لیکن میرے ساتھی کھلاڑی ہڑتال پر تھے اور ان کا کہنا تھا کہ وہ جب تک انھیں ادائیگی نہیں کی جاتی وہ نہیں کھیلیں گے۔

’پہلے تین ماہ تک میں اپنے گھر کے کرائے میں تاخیر کرتا رہا اور اپنی جمع شدہ رقم اور اپنی گرل فرینڈ کی آمدن استعمال کرتا رہا۔‘

وہ بتاتے ہیں: ’مجھے گھر سے رقم منگوانی پڑتی ہے۔ ایک فٹبالر ہوتے ہوئے یہ شرمندگی کی بات تھی، لیکن یہ حقیقت تھی۔ میں کھانا اپنے ایک دوست کی والدہ سے حاصل کر رہا تھا۔‘

عوبید نے اپنا معاملہ فیفا کے سامنے پیش کیا اور اکتوبر 2014 میں وہ یہ کیس جیت گئے، لیکن کلب نے انھیں صرف تین میچوں کے بعد فارغ کر دیا۔

وہ تاحال رقم کے منتظر ہیں اور ان کا کہنا ہے کہ اگر ریپڈ کلب نے انھیں رقم ادا نہ کی تو فیفا نے کلب کو اس کے پوائنٹس منسوخ کرنے کی دھمکی دی ہے۔

عوبید کہتے ہیں کہ ’وہاں کھلاڑی غلام بن جاتے ہیں‘

’میرے لیے کچھ مختلف تھا کیونکہ میں غیرملکی تھا اور میرے لیے وہاں کے قانون کی پاسداری ضروری نہیں تھی اگرچہ وہ ایسا ہی کرنا چاہتے تھے۔ میرے پاس کلب کی جانب سے خط موجود ہے جس میں مجھے بتایا گیا ہے کہ میں نے کلب کو رقم ادا کرنا ہے کیونکہ جب انھوں نے مجھے نکلنے پر مجبور کیا تو میں نے انھیں چھوڑ دیا۔‘

’مقامی کھلاڑیوں کے لیے یہ جدید دور کی غلامی ہے۔‘

جمعے سے وہ کھلاڑی جنھیں تین ماہ تک تنخواہ نہیں ملی وہ رومانین فٹبال فیڈریشن میں درخواست دائر کرسکتے ہیں اور انھیں دو سے چار ہفتوں میں کلب چھوڑنے کی آزادی مل جائے گی۔

کھلاڑیوں کی یونین افان کے صدر امیلین ہولوبی نے اس فیصلے کو خوش آئند قرار دیا ہے تاہم ان کا کہنا ہے کہ انھیں ڈر ہے کہ کہیں کلب اب بھی ’کھلاڑیوں کو غلط اقدامات سے دھوکہ دینے کی کوشش کر سکتے ہیں۔‘

انھوں نے کہا کہ ’ہمیں بہت سا کام کرنے کی ضرورت ہے۔ یہ اچھا ہے کیونکہ بہت سارے نوجوان کھلاڑیوں کلبوں میں پھنسے ہوئے ہیں اور اب وہ انھیں چھوڑ سکتے ہیں۔

مندرجہ ذیل چند ممالک کی فہرست ہے جہاں ’مذہبی پولیس‘ اسلامی اقدار کے نفاذ کے لیے گشت کرتی ہے۔

ایران میں 1979 کے انقلاب کے بعد مذہبی پولیس کی کئی قسمیں سامنے آئیں لیکن گشتِ ارشاد موجودہ مرکزی ایجنسی ہے جس کو لباس کے حوالے سے ضوابط کے نفاذ کا کام سونپا گیا ہے۔

گشتِ ارشاد کو 2007 میں غیر اسلامی لباس کے خلاف قائم کیا گیا تھا۔ ان کے دائرہ کار میں ہے کہ وہ لباس صحیح نہ پہننے پر کسی کی سرزنش کر سکیں، جرمانہ کر سکیں یا حراست میں لے سکیں۔ تاہم اس سال سے اس ایجنسی میں اصلاحات کے تحت ان کے اختیارات محدود کر دیے ہیں۔

اس کے بجائے سات ہزار گشتِ ارشاد کے خفیہ اہلکار تعینات کیے جا رہے ہیں جو ان خلاف ورزیوں کی رپورٹ پولیس کو کریں گے۔ اور پولیس فیصلہ کرے گی کہ آیا اس حوالے سے کوئی ایکشن لیا جائے یا نہیں۔

ایران کے صدر حسن روحانی نے گشتِ ارشاد پر تحفظات کا اظہار کیا ہے لیکن ملک کے آئین میں ان کو سکیورٹی فورسز کے کاموں میں دخل کا حق حاصل نہیں ہے۔

نام: کمیٹی برائے الامر بالمعروف و النہی عن المنكر یا مطوع

مطوع کا قیام 1940 میں ہوا اور ان کو عوامی جگہوں پر اسلامی قوانین کے نفاذ کی ذمہ داری سونپی گئیگ

ان ذمہ داریوں میں مردوں اور عورتوں کا ملنا جلنا، لباس بشمول حجاب کی درستگی شامل ہے۔

مطوع کو عام طور پر نوجوان اور لبرل لوگ ناپسند کرتے ہیں۔ تاہم اعتدال پسندوں میں بھی حالیہ کچھ واقعات کے باعث ناپسند کیا جانے لگا ہے۔ جیسے کہ ایک اداکار پر فرد جرم عائد کیا گیا کیونکہ اس نے مداحوں کے ساتھ سیلفی لینے کی اجازت دی۔ ایک اور واقعے میں اس پتلے کو قبضے میں لے لیا گیا جس پر غیر اسلامی لباس لٹکایا گیا تھا۔

حکام نے اب اس مذہبی پولیس کے اختیارات میں کمی کی ہے اور وہ اب لوگوں کو حراست میں نہیں لے سکتے بلکہ صرف پولیس کو نشاندہی کر سکتے ہیں۔

پبلک آرڈر پولیس کو 1993 میں صدر عمر البشیر نے قائم کیا۔ اس کا مقصد اس وقت کے شمالی سوڈان میں شریعت کا نفاذ تھا۔

اس پولیس کے اختیار میں ہے کہ وہ لوگوں کو گرفتار کرے۔ ان گرفتار افراد کا مقدمہ پبلک آرڈر کورٹس میں چلتا ہے جہاں جیل یا کوڑوں کی سزا دی جا سکتی ہے۔

اس پولیس فورس نے ایسی تقریبات بند کروائیں جہاں مرد اور عورتیں اکٹھے شامل تھے، غیر شریفانہ لباس پہننے پر عورتوں کی سرزنش کی اور ایسے کاروبار بند کیے جو شریعت کے مطابق نہیں تھے۔

اس پولیس پر عالمی سطح پر اس وقت تنقید کی گئی جب اس نے 2008 میں خاتون صحافی لبنیٰ الحسین کو ڈھیلے کپڑے پہننے پر گرفتار کیا اور سزا سنائی۔

نام: کئی نام ہیں لیکن عام طور پر ’مذہبی آفیسر‘ کہا جاتا ہے۔

یہ فورس ملائیشیا کی وفاقی حکومت کے تحت کام کرتی ہے اور اس کا کام شریعت کا نفاذ ہے۔

اس فورس کے اختیارات میں حراست میں لینا ہے۔ جن جرائم کے لیے یہ فورس حراست میں لے سکتی ہے ان میں رمضان میں کھانا کھانا اور مرد اور عورت کا بہت قریب بیٹھنا شامل ہے۔

حراست میں لیے جانے والے افراد کا مقدمہ شرعی عدالت میں چلایا جاتا ہے جو عام عدالتوں سے مختلف ہی

فوج پر کرپشن کے الزامات کوئی نئی بات نہیں۔ بات اراضی کی ہو، ہاؤسنگ سکیم کی یا سرمایہ کاری کی یا پھر اختیارات کے استعمال اور فنڈز میں خرد برد کی یہ الزامات ماضی میں بھی سامنے آتے رہے ہیں۔

لیکن فوج کی صفوں میں ایک ہی بار میں اتنی بڑی تعداد میں کرپشن کے الزامات پر نہ صرف اپنے افسران کو برطرف کرنا اور اس خبر کو عام کیا جانا ایک ایسا عمل ہے جس کی ماضی میں نظیر نہیں ملتی۔

فوج کا ہمیشہ یہ دعویٰ رہا ہے کہ فوج کے اندر خود احتسابی کا ایک نظام موجود ہے اور یہ عمل جاری رہتا ہے۔ لیکن فوج کے اندر کی جانے والی خود احتسابی کو کبھی منظر عام پر نہیں لایا گیا۔

ماضی قریب پر نظر دوڑائیں تو نیشنل لوجسٹک سیل یعنی این ایل سی کا کیس ان چند کرپشن کیسز میں سے ایک ہے جو سامنے آئے اور جن میں فوجی افسران کو سزا ہوئی تاہم اس کرپشن کیس کے لیے اہم کوشش پبلک اکاؤنٹس کمیٹی کی تھی جو سنہ 2009 میں بنی۔

اس عرصے میں یہ بات الزام سامنے آیا تھا کہ تین جرنیلوں نے سنہ 2004 سے 2007 تک سٹاک مارکیٹ سمیت مختلف شعبوں میں جو سرمایہ کاری کی اس سے این ایل سی کو ایک ارب 80 کروڑ روپے کا نقصان ہوا۔

لیکن پبلک اکاؤنٹس کمیٹی اور فوج کے درمیان یہ کیس ایک تنازع بن کر طوالت اختیار کر گیا تھا اور بلآخر اس میں جیت فوج کی ہی ہوئی تھی۔

اس کمیٹی کی سابقہ رکن یاسمین رحمٰن بتاتی ہیں کہ ’فوج چاہتی تھی کہ وہ خود انکوائری کرے تاہم ایک سال تک انتظار کرتے رہے مگر فوج کی جانب سے کوئی احتسابی رپورٹ نہیں ملی۔‘

اگست سنہ 2015 میں فوجی حکام نے بتایا کہ این ایل سی میں مالی بے ضابطگیوں کے الزامات کی تحقیقات کی روشنی میں دو فوجی جرنیلوں کو فوج سے برخاست کر کے ان کی تمام مراعات واپس لے لی گئی ہیں۔

فوج کی ہاؤسنگ سوسائٹیز پر بھی سوالات کئی بار اٹھائے جاتے رہے ہیں۔

سنہ 2011 میں سپریم کورٹ میں ازخود نوٹس کے تحت چلنے والا ریلوے لینڈ کیس اس کی ایک مثال ہے جس میں تین سابقہ جرنیلوں سے جواب طلبی کی گئی تھی۔یہ کیس اب بھی زیرِ التوا ہے۔

دفاعی امور کے ماہر پروفیسر حسن عسکری رضوی کہتے ہیں کہ اسی سے نوے کی دہائی تک فوج پارلیمانی کمیٹیوں کے سامنے جانے سے ہچکچاتی تھی تاہم جنرل کیانی کے دور میں تبدیلی نظر آئی۔ وہ کہتے ہیں کہ اگرچہ اب بھی فوج اپنے قواعد کے تحت محکمانہ کارروائی کرنا چاہتی ہے اور اپنے سسٹم کو ہی صحیح مانتی ہے تاہم حالت اب پہلے سے کچھ مختلف ضرور ہوئے ہیں۔

خبر رساں ادارے روئٹرز کے مطابق بینک میں کسی قسم کی فائروال موجود نہیں تھی اور عالمی مالیاتی نیٹ ورک کے ساتھ جڑنے کے لیے صرف دس ڈالر کا استعمال شدہ راؤٹر لگایا گیا تھا۔

روئٹرز کے مطابق ایک سرکاری تفتیشی افسر کا کہنا ہے کہ بہتر سکیورٹی کا نظام اور ہارڈویئر آن لائن حملہ آوروں کے لیے رکاوٹ پیدا کر سکتا تھا۔

ہیکرز ایک ارب ڈالر چوری کرنے کی کوشش کر رہے تھے لیکن ان کی جانب سے کچھ غلطیوں سے چوری کی نشاندہی ہوئی اور اسے روک لیا گیا۔

چوری کی تفتیش کرنے والی ٹیم میں شامل فورنزک تفتیش کار محمد شاہ عالم کا کہنا ہے کہ ’فائروال ہیکرز کی طرف سے چوری کی کوششوں کو مشکل بنا سکتی تھی۔‘

انھوں نے مزید کہا کہ ’استعمال شدہ ہارڈویئر کا مطلب ہے کہ نیٹ ورک ٹریفک کو الگ کرنے کے لیے سکیورٹی کے بنیادی اقدامات نہیں کیے گئے تھے۔‘

فروری میں ہونے والی اس چوری میں آن لائن چوروں کے ایک گروہ نے چوری شدہ معلومات یوں استعمال کیں تھیں کہ ایسا لگے کہ رقوم کی ادائیگی قانونی طور پر کی جا رہی ہے۔

تاہم نیویارک کے فیڈرل ریزرو بنک نے سلسلہ وار رقوم کی ادائیگیوں کی مشتبہ درخواستیں موصول ہونے کے بعد بنگلہ دیش کے مرکزی بنک کو خبردار کیا تھا۔

بڑے پیمانے پر ادائیگیوں اور املا کی غلطی کی وجہ سے بنک میں کام کرنے والوں کو چوری کا شبہ ہوگیا۔

نام کے ہجوں میں غلطی کی وجہ سے ڈوئچے بنک نے سنٹرل بنک سے اس کی تصدیق چاہی جس کے بعد اس ادائیگی کو روک دیا تھا۔

بینک کے سکیورٹی ماہرین کا کہنا ہے کہ بینک کو نیٹ ورک کی حفاظت کے لیے زیادہ پیسہ اور وقت لگانا چاہیے۔

٭ چیف جسٹس کو خط لکھنے کا اعلان

حزب اختلاف کی بڑی جماعت پاکستان پیپلز پارٹی کے شریک چیئرمین بلاول بھٹو زرداری نے وزیر اعظم کی تقریر کے بعد ٹویٹ میں کہا کہ ’وزیر اعظم نے اپنے آپ کو پارلیمان کے سامنے پیش نہیں کیا اور وضاحت نہیں کی۔ ان کو اپنے مشورے پر عمل کرنا چاہیے اور مستعفی ہو جانا چاہیے۔‘

یہ پہلا موقع ہے جب پاکستان تحریک انصاف کے بعد پاکستان پیپلز پارٹی نے بھی وزیر اعظم کے استعفے کا مطالبہ کیا ہے۔

حزب اختلاف کی دو بڑی جماعتوں پاکستان پیپلز پارٹی اور تحریک انصاف کے رہنماؤں نے مقامی ذرائع ابلاغ پر نواز شریف کی تقریر پر اپنا رد عمل ظاہر کرتے ہوئے کہا کہ اس میں طعنہ زنی اور دھمکیوں کے علاوہ کچھ نہیں تھا۔

وزیر اعظم کی تقریر کے بعد سامنے آنے والی تحقیقاتی کمیشن کے قواعد اور ضوابط اور کارروائی کے طریقے کار کی شقوں کے بارے میں پیپلز پارٹی کے رہنما اعتزاز احسن نے کہا کہ حکومت نے یہ کمیشن یک طرفہ طور پر اپوزیش کو اعتماد میں لیے بغیر بنایا ہے۔

انھوں نے کہا کہ حکومت نے پاکستان انکوائری ایکٹ 1956 کے تحت بنایا ہے جبکہ حزب اختلاف ایک خصوصی قانون کے تحت کمیشن بنانے کا مطالبہ کر رہی ہے۔

انھوں نےکہا کہ سنہ 2015 میں جسٹس ناصر الملک کی سربراہی میں جو کمیشن بنایا گیا تھا اس کے لیے نیا قانون بنایا گیا تھا۔

پاکستان تحریک انصاف کے رہنما علیم خان نے کہا کہ ’نواز شریف ذاتیات پر اتر آئے ہیں اور انھوں نے عمران خان پر رقیق حملے کیے ہیں۔‘

انھوں نے کہا کہ نواز شریف کےسنہ 2015 میں دھاندلی کے الزامات کی چھان بین کے لیے بنائےگیا کمیشن حکومت اور تحریک انصاف کے ارکان نے مشترکہ طور پر بنایا تھا۔

پیپلز پارٹی کے رہنما قمر زمان کائرہ نے کہا کہ ’قوم سے خطاب میں پالیسی بیان دیے جاتے ہیں جبکہ نواز شریف دھمکیاں اور طعنے دیتے رہے۔‘

انھوں نے کہا کہ ’وزیر اعظم کے پاس موقع تھا کہ وہ اپنی صفائی پیش کرتے لیکن انھوں نے یہ موقع ضائع کر دیا۔‘

عوامی مسلم لیگ کے سربراہ شیخ رشید نے کہا کہ حکومت نے یہ اعلان ایک ایسے وقت کیا ہے جب سپریم کورٹ کے چیف جسٹس انور ظہیر جمالی ایک ہفتے کے لیے ملک سے باہر جا رہے ہیں۔

شیخ رشید کے مطابق حکومت نے ایک مرتبہ پھر وقت حاصل کرنے کی کوشش کی ہے۔

یکام کے مطابق دونوں افراد کی ہلاکت کا واقعہ ضلع آواران کی تحصیل مشکے میں پیش آیا۔

سرکاری ذرائع کے مطابق دونوں افراد کی شناخت عادل بلوچ اور ماجد بلوچ کے ناموں سے ہوئی ہے جو ضلع آواران کے رہائشی تھے۔

ان میں سے عادل کا تعلق تحصیل مشکے جبکہ ماجد کا تعلق آواران سے تھا۔

سرکاری ذرائع نے بتایا کہ دونوں افراد عسکریت پسند تھے اور وہ تحصیل مشکے کے علاقے منگلی میں سکیورٹی فورسز کے فائرنگ کے تبادلے میں مارے گئے۔

دوسری جانب ان افراد کی ہلاکت کے حوالے سے قوم پرست جماعت بلوچ نیشنل موومنٹ نے میڈیا کو ایک بیان جاری کیا ہے۔ اس بیان میں بی این ایم نے دونوں افراد کی فائرنگ کے تبادلے میں ہلاکت کے دعوے کو مسترد کیا ہے۔

بیان میں الزام عائد کیا گیا ہے کہ دونوں افراد کو پہلے ہی ریاستی اداروں کے اہلکاروں نے جبری طور پر لاپتہ کیا تھا۔

بیان کے مطابق مارے جانے والوں میں سے ماجد بلوچ کو اس سال 6 جنوری کو جبکہ عادل بلوچ کو 27 فروری کو جبری طور پر لاپتہ کیا گیا تھا۔

بی این ایم نے الزام عائد کیا ہے کہ دونوں کو دوران حراست ہلاک کرنے کے بعد ان کی لاشیں منگلی کے علاقے میں پھینکی گئی ہیں۔ بیان کے مطابق ماجد بلوچ کالعدم بلوچ اسٹوڈنٹس آرگنائزیشن آزاد کے رکن تھے۔